الجمعة، 18 أكتوبر 2013

يا مسافر وحدك !

تتردد نغمات الأغنية في الخلفية مع صورة لها تستند وحيدة إلى شباك السيارة
تليها نغمات لفيروز وهي تطيِّب روحها بمزيج من الحنان والفرح

الطريق طويل.. هي نفسها تتحمله قدر استطاعتها.. وتفقد قدرتها هذه أحيانًا كثيرة
من سيتحمل عنها هذا العبء؟ أو على الأقل سيحمله معها؟

الطريق يحتاج للصبر
النجاح يحتاج للصبر

الوصول يحتاج للصبر

#الطيبون_للطيبات
#الصابرون_للصابرات
#المثابرون_للمثابرات

#المجد_للمعافرة

الخميس، 1 أغسطس 2013

حوليات شهر يوليو : تجميعة رمضان .. الخوف والمسافات

الكتابة تشفي من الكثير
وتوثق الكثير على الجانب الآخر

خوفك من المجهول يتخلل كل كتاباتك.. ولذلك تتجنب الكتابة قدر المستطاع حتى لا تواجهه.. يوميَّاتك التي تخشى قراءتها في مرحلة متقدمة من الآن.. أسوء كوابيسك عندما تزورك في جميعًا في يومٍ واحد مثلما فعلت بالأمس

تكتبها وتخفيها من نفسك حتى لا تتخيلها مرة أخرى.. الخوف من الأحلام يكمن في رؤيتك للكابوس متجسِّد أمامك.. ملموس بالإحساس والرهبة ودقات القلب

تظل توازن بين التوكل والتواكل.. بين الإيمان بالغيب وبين الأخذ بالأسباب.. بين الإيمان بقلبك وبين التشكك بعقلك !

يظل كل هذا ككفتي ميزان يتأرجحان دون أي تدخل منك..

يظل الدعاء هو الرابط الحقيقي الذي يستمر ليشعرك بقيمتك الإنسانية وصلتك بالدين والله والناس

يا رب !

-----------------------------------


يا قاهر المسافات
متخلنيش واحد
متخلنيش اكتر
خليني ف المجموع
نسيني ابات شبعان
علمني اموت م الجوع
يمكن كده اتطهر

يا قاهر المسافات
يا فوق سبع سماوات
قاعد بتتأمل
مش قادر اتحمل
اني بعيد عني
بيني وبيني بلاد
*والسكة لسه بعيد
بس اللقا حاضر
خلي السلام جنة
خلي الحنين موجود
زيده في كل صلاة
يمكن يكون قادر
انه يكفيني
متخلنيش عطشان
ارويني من وصله
علشان أحس العيد
مليان كده باسمه

...


الثلاثاء، 9 يوليو 2013

حوليَّات مجمعة #6 و#7 و#8 و#9 و#10: الليل مش على اد كتافي !


مع بداية رمضان واختفاء كامل لروح رمضان من جوايا.. شيء مكسور جوه مانع رمضان ياخد وضعه زي كل سنة
يمكن احداث الموت الكتير الفترة اللي فاتت.. الدم اللي بقى رخيص اوي ومحدش بيتحاسب عليه.. الحياة اللي بتضلم وبتنور على مزاجها من غير اي انذار مسبق.. الأحلام اللي بتطلع للسما وبعدها بتنزل لسابع أرض برده من غير انذار مسبق

"الحلم بيكمل يادوب
حبّة شهور
وبيختفي من غير سبب !"

انا قلت انهم حبّة شهور.. مكنتش اعرف انه ممكن يكمل حبّة ايام بس !

يا رب انت مش بعيد.. انت شايف وعارف كل ده
متسبنيش بعيد عنك.. متسبنيش اتلخبط وانا مش شايفة الطريق اساسا !
يا رب انت اللي عالم بكل شيء
يا رب حكمتك
---------------------
اجعلنى قصيدة ..
تنهيدة ..
تخلص و تروح ..
كتكوت فى الشمس بيطوح ..
اجعلنى شهاب فى السموات..
أجعلنى كولينه ستات ..
خلينا ندور على بيتنا و نلاقيه دافى ..
الليل مش على قد كتافى ..
و الصبح بعيييد ..
أجعلنى سعيد ..
أجعلنى فى العيد كحكايه أو لبس جديد ..

وجعانى وتكشيره الدنيا ..
و وجعنى الوقت ...
أجعلنى صحبه ورد ..
و متجعلنيش أبدا زهريه على باب القبر ..
علمنى الصبر ..

علمنى أفضفض وأنا مبسوط ..
علمنى أكون نساى ..
علمنى أموت ..
بس قبل ما أموت أجعلنى نعنايه فى كوبايه شاى بتغنى ..
بتغنى بتغنى.. بتغنى فى الحلق..!

*اسكندريلا - نعناعه في كوباية شاي - كلمات احمد حداد
---------------------

من أحلى الحاجات اللي ممكن تعملها في الفترات اللي زي دي من حياتك انك تطحن نفسك في الشغل.. فمتشوفش قدامك اساسا ولو ان غالبا لو عايز تفكر في حاجة هتفكر برده رغم التعب والارهاق

نظرتك ممكن تتغير للحياة من موقف.. نظرة الناس ليك واللي بيشوفوه في وشك ممكن يبان من كلمة.. السيء في الموضوع انك متقدرش تغيّر ملامحك في الوقت ده.. كان هيبقى احساس حلو لو تغيّر ملامحك خالص في الموقف ده.. تبقى حد تاني.. او تبقى انت نفسك بس لابس وش نفسك وانت كويس فمفيش حد يقولك مالك ولا انت ليه حزين كده !

#المذكرات
في الطبيعي بتبقى ذكرى كويسة.. انك تخاف تكتبها اساسًا ده مش شيء مبشّر خالص
المذكرات دي واقفة بقالها 3 شهور على الأقل.. شكلها كانت ناوياها علشان كده وقفت.. يمكن كده احسن محدش عارف
ولو ان الذكريات في المواقف اللي زي دي مش محتاجة تتكتب.. هتتحفر جوه من غير اي تدخل منك اساسًا

#عن_التجارب_الجديدة
انك تطلع تشم الهوا وهو لسه نضيف الساعة 5 ونص الصبح.. تقعد على الارض في البلكونة وتبقى شايف الشجر والعصافير والسما في نفس الوقت.. احساس بهجة مفرط

ولأنك بتربط كل حاجة ببعضها احساس البهجة نفسه ممكن يتقلب ويبقى اسوء مما تتخيل

#عن_القلب_واللي_جواه
خلي بالك من قلبك بس في وسط ده كله

محدش عارف اللي جواه غيرك.. ومحدش يلزمه يعرفه غير لما انت تقرر ده
بس اساسا القلب ده بيبقى شفاف في الطبيعي.. اي حد بره هيبقى عارف يشوف لو ركّز بس وكان عايز يشوف فعلًا
بس لانه شفاف اعتقد بيبقى زي الكوباية برده.. بيتكسر ولو اتكسر هيعوّر كتير جوه جسمك.. روحك مثلًا.. ابتسامتك.. تفكيرك.. نظرة عينيك
الازاز بيبقى قابل للاصلاح.. اوقات يعني.. من نعم ربنا علينا فعلًا

الحب اللي جوه كتير.. بس مش هيعرف يصمد لوحده.. مش هيقدر يعمل ده علشان هو جوه الكوباية والكوباية ازاز وهو خايف يتعوّر !

#عن_ارتباط_الأحلام_بالأشخاص
متربطش حلمك بحد.. متربطش حياتك ومستقبلك بحد.. على فكرة يمكن جدًّا لو حياتك اتظبطت بعيدًا عنه تلاقيه جنبك.. لو ربطتها بيه وهو اختفى لاي سبب بمزاجه او غصب عنه انت هتقع.. ومحدش هيستفيد حاجة من ده

جمال ربط الاحلام ده انك بتشوف الحلم في الواقع وبتصدقه وبتفرح بيه وتعيش كل لحظة فيه وكأنها اخر لحظة
السيء انه لو الحلم ده حصله اي حاجة انت مضطر تقنع نفسك انه خلاص مبقاش موجود.. تعايش مع نفسك لو تعرف ف الحالة دي بقى
علشان كده خلي أحلامك منفصلة عن أحلام الأنس والحب والألفة

#انسحاب_الروح
حالة بتعاني فيها من عدم ادراك للمكان ولا الزمان ولا التصرفات .. خمول تام في جسمك وعقلك.. مش عايز تقوم ولا تفكر ولا تتكلم ولا تكتب .. مبقاش فيه حاجة فارقة معاك.. ممكن تقول حالة تتنيح مستمر مثلا :)
ويمكن تشمل تعذيب النفس والآخرين.. سادية ومازوخية في نفس الوقت يعني.. انفصام في الشخصية 
ملهاش اسباب محددة.. بتيجي اوقات وتحسها كل يوم.. واوقات بتقعد كتير اوي على ما تحسها
ع الاقل بتحسسك انك فيك بقايا روح.. حتى لو بتنسحب خلاص !

#عن_سنة_26
كنت متفائلة بيكي.. بس واضح انك مكنتيش متفائلة بيا.. يلا خير بقى
اهدي عليا شوية بس علشان دول اول شهرين فيكي لسه بدري

#الحوليّات
شكلك هتبقي متعِبة فعلًا

الجمعة، 5 يوليو 2013

حوليَّات #3 , #4 , #5 : الحلم !

تتلخص الحياة أحيانًا في حلم واحد.. قد يكون محور الحياة.. قد يأتي من خارجها ليشغل حيِّزًا كبيرًا فيها دون أدنى ترتيب أو توقّع

المشكلة الوحيدة في الحلم الأوحد هو تعلُّق الحياة به.. وانتهاؤه في أي وقت لأي سبب من الأسباب قد يؤدي لتوقف الحياة مؤقتًا !
الحياة لا تقف على حلم.. ولا شخص.. ولا وظيفة.. ولا ظروف.. ستستمر رغم أي شيء.. هذا بديهي.. لكن توقفها المؤقت هذا يمنع لحظات الاستمتاع الطبيعية في كل المواقف لخوفك من خوض تجربة فقدان الحلم.. 

هذه هي الأزمة الكبرى في الأحلام !

------------------------
#3

الحلم يولد من الفراغ أحيانًا.. أحاول التمسك به فقط !

------------------------
#4

الحلم يكبر بالأمل.. وبالخيال.. وبالسعادة !

------------------------
#5

الحلم يحتاج لاطمئنان.. ويظل كذلك حتى يتحقق.. إذا قُدِّر له ذلك !


الثلاثاء، 2 يوليو 2013

حوليَّات #2: عن الحوليَّات

على الصعيد الأكبر في الوطن.. ما زالت الأرض تشتاق لدم أبنائها كأنها لم تشبع بعد

على كل الأصعدة الأخرى.. عودة التدوين راحة.. عودة التدوين بعيدًا عن الأماكن المزدحمة راحة أكبر

حملة التدوين السنوي.. #الحوليَّات.. خطوة كبيرة يمكنها أن تقربني مجددًا من قلمي.. وقلبي.. وأفكاري

---------------------
عودة الاتزان يحتاج لوقت.. عودة الكتابة تحتاج لوقت.. فقط أستغل هذا الوقت لحين عودتهما !

الاثنين، 1 يوليو 2013

بداية الحوليّات - مصير

بداية غير موفقة لفكرة الحوليّات..

أن تتخذ قرار يمسّ غيرك أصعب كثيرًا من اتخاذك لقرار يسيء إليك ! 

لا تحمِّل نفسَك ذنوب لا تستطيع احتمالها.. ستدفع ثمنها عاجلًا أم آجلًا

نصيحة الحياة والمجتمع لليوم:
 استفتِ قلبك.. ولا تستمع له.. واتبع عقلك .. ستكون في كل الحالات بائس على أيَّة حال !